အထူးအစည်းအဝေးရဲ့ ထူးခြားချက်

အမျိုးသားဒီမိုကရေစီအဖွဲ့ချုပ်ရဲ့ အထူး အစည်းအဝေး ကတော့ ပြီးသွားပါပြီ။ ပြည်သူ တွေဟာ သူတို့မဲတွေ သွန်ပေးခဲ့တဲ့ အဖွဲ့ချုပ်မို့ ဒီအစည်းအဝေးကို အာရုံထား စောင့်ကြည့်ခဲ့ ပါတယ်။ အထူးသဖြင့် ဒီကာလဟာ အမျိုးသား ဒီမိုကရေစီအဖွဲ့ချုပ်အဖို့ ကြီးမားတဲ့ အခက်အခဲ၊ ကြီးမားတဲ့စမ်းသပ်မှုနဲ့ တွေ့ကြုံရမှာ သေချာနေတဲ့ အတွက် ပြည်တွင်းပြည်ပက ပိုပြီး အာရုံစိုက်ခဲ့ ကြပါတယ်။

အစည်းဝေးပြီးလို့ ရွှေဂုံတိုင် ကြေညာစာတမ်း ထွက်လာတော့ ပြည်သူတွေ သက်ပြင်းချနိုင်ကြပါတယ်။ တကွေ့တော့ ကျော်သွားပြီပေါ့။ ဒါပေမယ့် နအဖက မုချမကျေနပ်မှာကို စဉ်းစားမိပြီးတော့လည်း အမျိုးသား ဒီမိုကရေစီ အဖွဲ့ချုပ် အတွက် စိုးရိမ်မှုတွေ မပေါ်ဘဲ မနေနိုင်ကြပါဘူး။ တကယ်တော့ အခက်အခဲ တွေက အခုမှအစပဲ ရှိပါသေးတယ်။ ရွေးကောက်ပွဲနဲ့ နီးလာလေ နအဖက ပေးလာ နိုင်တဲ့ အန္တရာယ်ဂယက်ဟာ ကြီးလာလေဖြစ်မှာပါ။

အမျိုးသား ဒီမိုကရေစီအဖွဲ့ချုပ်က “ရွေးကောက်ပွဲဝင်ဖို့ဆိုရင် နိုင်ငံရေး အကျဉ်းသားတွေ လွှတ်ပေးရမယ်၊ ၂ဝဝ၈ ဖွဲ့စည်းပုံ ဥပဒေကို ပြန်ပြင် ပေးရမယ်၊ နိုင်ငံတကာကြီးကြပ်မှုနဲ့ တရားမျှတတဲ့ ရွေးကောက်ပွဲ ကျင်းပရမယ်” ဆိုတဲ့ နအဖကလိုက်လျောရမယ့် အချက်သုံးချက် တင်လိုက်တာကို အာဏာရှင်ဗိုလ်ချုပ်တွေ မုချပဲ ဒေါပွကြမှာပါ။ အာဏာရှင် တွေဟာ သူတို့ ကသာ အထက်စီးကနေ သူများတွေအပေါ် တင်ကြို သတ်မှတ်ချက် တွေနဲ့ တောင်းဆို ချင်ကြ တာပါ။ ထောင်ကလွှတ်ရင်တောင် အချက်အလက်တွေ လက်မှတ်ထိုးခိုင်း တတ်တယ် မဟုတ် ပါလား။ ဒါပေမယ့် သူများက သူတို့အပေါ် ဒီလိုတောင်းဆိုတာကိုတော့ နည်းနည်းမှ သည်းမခံ နိုင်ပါဘူး။ ဒီတော့နအဖ ဘယ်လိုတုံ့ပြန်မယ်ဆိုတာ စောင့်ကြည့်ရပါမယ်။ ပြောင်ကြီး၊ တိုက်ရိုက် တုံ့ပြန်တာတော့ လုပ်ကောင်းမှ လုပ်ပါ လိမ့်မယ်။ ဒါပေမယ့် ငြိမ်နေမှာတော့မဟုတ်ပါဘူး။

ဒီနေရာမှာ အမျိုးသားဒီမိုကရေစီအဖွဲ့ချုပ်ရဲ့ ဒီတောင်းဆိုချက်တွေကို မလိုက်လျောဘဲ နေလိုက် ရင် ပြီးရော မဟုတ်လားလို့ မေးစရာရှိပါတယ်။ မပြီးပါဘူး။ အမျိုးသားဒီမိုကရေစီအဖွဲ့ချုပ်ရဲ့ ဒီအစည်းအဝေးဟာ နအဖ အတွက် ကြည့်နေလို့ မဖြစ်တဲ့ကိစ္စလို့ သဘောထားမှာ သေချာ ပါတယ်။ နောက်ပြီး ဒီလိုကြေညာချက် ထွက်လာတာကို လက်ပိုက်ကြည့်နေတယ်ဆိုတဲ့ အဖြစ်မျိုး လည်း ဗိုလ်ချုပ်တွေက အရောက်ခံမှာမဟုတ်ပါဘူး။

တကယ်တော့ နဂါးမျက်စောင်း အကြောင်းသုံးပါး မရွေးဘူးဆိုတာကို အမျိုးသား ဒီမိုကရေစီအဖွဲ့ချုပ် ခေါင်းဆောင်တွေ မသိတာ မဟုတ်ပါဘူး။ အထူးသဖြင့် ဗိုလ်သန်းရွှေ ပါးစပ်ကထွက်သမျှ ဥပဒေဖြစ်နေတဲ့ ဒီကာလကြီးမှာ သူတို့အနေနဲ့ အဆိုးဆုံးအတွက် ပြင်ဆင် ထားပါမှ တော်ရုံရှိမှာပါ။ နအဖစစ်အစိုးရတွေဟာ နောက်ဆုံးမှာ ကျားပွဲကိုမနိုင်ရင် ကျားခုံကို မှောက်ပစ်တယ် ဆိုတာလို အမျိုးသားဒီမိုကရေစီအဖွဲ့ချုပ်အပေါ်မှာ ညစ်ညစ် ပတ်ပတ် လုပ်လာ နိုင်တယ်ဆိုတာအထိ တွက်ထားပြင်ဆင်ထားကြရမှာပါ။

ဒီတခါ အထူးအစည်းအဝေး ကျင်းပ နိုင်လိုက်တဲ့ အတွက် အမျိုးသား ဒီမိုကရေစီ အဖွဲ့ချုပ်ဟာ ဒီကနေ့ နောက်ဆုံး အခြေအနေနဲ့ ကိုက်ညီတဲ့ နိုင်ငံရေး လမ်းစဉ် တရပ် ရသွားပြီလို့ ဆိုနိုင်ပါတယ်။ ဒေါ်အောင်ဆန်းစုကြည်က ဘယ်တုန်း က ဘယ်လိုပြောခဲ့တယ်လို့ အဟောင်းကို ပြန်ကိုးကားပြီး လုပ်နေရတာထက် ပိုမိုတိကျတဲ့ လုပ်ငန်း လမ်းညွှန်တရပ် ရှိသွားပြီဖြစ်ပါတယ်။ ဒါပေမယ့် ဒါဟာ ပထမခြေလှမ်းပဲဖြစ်ရပါမယ်။ ဒါကိုထုတ်ပြန်လိုက်တာနဲ့ တို့တာဝန် ကျေသွားပြီလို့ ဆိုနေလို့ မဖြစ်ပါဘူး။ လမ်းစဉ်တရပ်၊ လုပ်ငန်းစဉ် တရပ်ဟာ ဘယ်လောက်ပဲမှန်မှန်၊ အကောင်အထည် ဖော်မယ့်လူ မရှိရင် စာရွက်ပေါ်မှာပဲ တင်ကျန်ရစ်မှာပါ။ လူတွေက အကောင်အထည်ဖော် တော့မှ အင်အားကြီး တရပ်ဖြစ်လာ ပါမယ်။ ဒါကြောင့် နောက်တလှမ်းဟာ လက်တွေ့ပိုင်း ဖြစ်ပါတယ်။ စစ်အစိုးရက တကယ့် အမြောက်တွေနဲ့ အမျိုးသား ဒီမိုကရေစီ အဖွဲ့ချုပ်ကို ထုနေချိန် မှာ အမျိုးသားဒီမိုကရေစီအဖွဲ့ချုပ်က သင်္ကြန်အမြောက် လောက်နဲ့ တုံ့ပြန်ဖို့ မစဉ်းစားဘူးလို့ ယုံကြည်ပါတယ်။

ဆိုလိုတာ အမျိုးသားဒီမိုကရေစီအဖွဲ့ချုပ်အနေနဲ့ ပါတီတည်ဆောက်ရေး လုပ်ငန်း၊ ပါတီတွင်း စည်းရုံးရေး လုပ်ငန်းကို သေချာလုပ်ရပါတော့မယ်။ ဒီရွှေဂုံတိုင်ကြေညာစာတမ်းကို လူထုဆီကို သယ်သွားမယ်၊ လက်တွေ့ အကောင်အထည် ဖော်မယ့်တပ်ဖွဲ့ကို ပြင်ဆင်ရပါတော့မယ်။ ပြင်ဆင်တယ် ဆိုရာမှာ ကိုယ့်တပ်ဖွဲ့ကို ဖြစ်နိုင်တဲ့အခြေအနေ အဆင့်ဆင့် အတွက် သေသေ ချာချာ စဉ်းစားပြီး ပြင်ဆင်ရပါမယ်။ “ခဲ့သော်” ၊ “ ခဲ့သော်” တွေအတွက်ပါ ပြင်ရမယ်။ တဗိုလ်ကျ တဗိုလ်တက် ဆိုတာအထိ စဉ်းစားပြီး ပြင်ဆင်သင့် ပါတယ်။

အားလုံးသိကြတဲ့အတိုင်းပဲ နအဖအစိုးရဟာ အမျိုးသားဒီမိုကရေစီအဖွဲ့ချုပ်ကို ခေါင်းဆောင်ပိုင်းနဲ့ အောက်ခြေ အဆက်ဖြတ်ထားတာကြာပါပြီ။ ခေါင်းပိုင်းကို ထောင်ထဲ၊ အိမ်ချုပ်ထဲထည့်ထားပြီး ဒုတိယအဆင့်ခေါင်းဆောင်ပိုင်း ကိုလည်း အမျိုးမျိုး ခြိမ်းခြောက်ထားတာပါ။ ဒါကြောင့် အဖွဲ့ချုပ် အတွင်းမှာ အမြင်မကြည်လင်မှုတွေ ရှင်းရခက်နေ တယ်ဆိုတာကို သတိထားမိပါတယ်။ ဒါတွေကို ကျော်လွှားဖို့ တခုတည်းသောနည်းကတော့ လူထုနဲ့လက်တွဲ၊ လက်တွေ့ လုပ်ငန်းထဲမှာ ဝင်ပါရင်း အပြန်အလှန်နားလည်မှုတွေ တည်ဆောက်ကြရမှာဖြစ်ပါတယ်။

နအဖက အဆက်ဖြတ်ဖို့ ကြိုးစားတဲ့ နောက်တဆင့်ကတော့ အမျိုးသား ဒီမိုကရေစီ အဖွဲ့ချုပ်ကို ပြည်သူလူထုနဲ့ မဆက်မိအောင် လုပ်တာပါပဲ။ အမျိုးသား ဒီမိုကရေစီအဖွဲ့ချုပ် အဖွဲ့ဝင်တွေ ချည်းလှုပ်ရှားတဲ့ လုပ်ငန်းဆိုရင် သူတို့က သိပ်မပြောပေမယ့် လူထုနဲ့တွဲလုပ်တဲ့ လုပ်ငန်း ဆိုရင်တော့ နည်းနည်းမှ သည်းမခံပါတူး။ အခု ဒီကြေညာစာတမ်း ထွက်ပြီးပြီဆိုတော့ လူထု လက်ထဲ ဘယ်လိုပို့မလဲ၊ လူထုကို ဘယ်လိုအကောင်အထည်ဖော်စေမလဲ ဆိုတာတွေ စဉ်းစား ပြင်ဆင် ရပါတော့မယ်။ နအဖဟာ ဆုံးဖြတ်ချက် ချတာထက် ကြေညာချက်ထုတ်တာကို ပိုမကြိုက်ပါဘူး။ ဒါ့အပြင် ကြေညာချက် ထုတ်တာထက် လက်တွေ့အကောင်အထည်ဖော်တာကို ပိုမကြိုက်ဘူးဆိုတာ အားလုံး သိထားပြီးသားပါ။

အမျိုးသားဒီမိုကရေစီအဖွဲ့ချုပ်ရဲ့ ဒီအထူးအစည်းအဝေးကျင်းပတာနဲ့ တနေ့ တည်းမှာ နအဖက ငြိမ်းအဖွဲ့တွေကို တဖွဲ့ချင်းခေါ်တွေ့ခဲ့တာကို သတိထား မိကြပါမယ်။ ဒါဟာ ရွေးကောက်ပွဲ မတိုင်မီအထိ ငြိမ်းအဖွဲ့တွေရဲ့ အနေအထား ကို သတ်မှတ်ပေးလိုက်တာ ဖြစ်ပါတယ်။ ငြိမ်းအဖွဲ့ တွေရဲ့ကိစ္စကို ယာယီ ဖြေရှင်းလိုက်တာ ဖြစ်ပါတယ်။ အမျိုးသား ဒီမိုကရေစီ အဖွဲ့ချုပ်ရဲ့ အလှည့် ရောက်ပြီ ဆိုတဲ့ အဓိပ္ပာယ်လား တွေးစရာဖြစ်လာပါပြီ။ ဘာပဲပြောပြော အမျိုးသား ဒီမိုကရေစီ အဖွဲ့ချုပ်ဟာ နအဖဖိအားပေးတိုင်း အလျှော့ပေးတဲ့ အဖွဲ့အစည်း မဟုတ်ဘူးဆိုတာကို ဒီတပွဲမှာ တွေ့လိုက်ကြရပါပြီ။

ဗမာပြည်ရဲ့ ခေတ်သစ်နိုင်ငံရေးသမိုင်းမှာ အုပ်စိုးတဲ့လူက ပေါ်စေဆိုရင် ပေါ်လာပြီး ပျောက်စေ ဆိုရင် ပျောက်သွားတဲ့ နိုင်ငံရေးပါတီအဖွဲ့အစည်းတွေ တကယ်ပဲမနည်းပါဘူး။ (လာမယ့် ရွေးကောက်ပွဲ အတွက် တာစူနေတဲ့ ပါတီတွေအထဲ မှာ အဲဒီလိုပါတီ ဘယ်နှခုပါမယ်ဆိုတာ စောင့်ကြည့် ရပါမယ်။) တကယ်တော့ နိုင်ငံရေးပါတီဆိုတာဟာ ဆရာဗန်းမော် တင်အောင် ပြောသလိုပဲ သူ့ခေတ်၊ သူ့ပြည်သူကပေးတဲ့ တာဝန်ကို ကျေပွန်ရပါမယ်။ အဲဒီလိုတာဝန်ကို မကျေပွန်ဘဲ၊ မပြီးမြောက်ဘဲ ပါတီ ပျောက်ကွယ်သွားတယ် ဆိုရင် စစ်တိုက်နေတုန်း တပ်ပြေးတဲ့ သဘောမျိုး ဖြစ်သွားမှာပါ။ အမျိုးသား ဒီမိုကရေစီအဖွဲ့ချုပ်လို ပြည်သူလူထုတရပ်လုံးက ယုံကြည် အားကိုးစွာနဲ့ မဲတွေ ပုံအောပေးခံထားရတဲ့ အဖွဲ့အစည်းဆိုရင် လူထုကပိုပြီး မြင့်မြင့်မားမား တောင် တောင်းဆိုပါတယ်။ ဒီတော့ အမျိုးသားဒီမိုကရေစီ အဖွဲ့ချုပ်ရဲ့တာဝန်ဟာ ကြီးမားလှ ပါတယ်။