Thursday, February 12, 2009

၆၂နှစ်မြောက် ပြည်ထောင်စုနေ့


စာအမှတ်- စကလ/လစဖ/၀၃/၀၉
နေ့စွဲ -၁၂-၂-၀၉

လာမည့် ဖေဖေါ်ဝါရီလ ၁၂ ရက်နေ့သည် ကျွန်ုပ်တို့ မြန်မာပြည်၏ ၆၂နှစ်မြောက် ပြည်ထောင်စုနေ့ အခါသမယ ဖြစ်ပေသည်။ ၁၉၄၇ခုနှစ် ဖေဖေါ်ဝါရီလ ၁၂ရက်နေ့က အမျိုးသားခေါင်းဆောင် ဗိုလ်ချုပ် အောင်ဆန်း ဦးဆောင်သော တိုင်းရင်းသား ခေါင်းဆောင် များသည် အမျှော်အမြင် ကြီးမားစွာဖြင့် တောင်တန်းနှင့် ပြည်မ ဒေသအားလုံး တပေါင်းတည်း လွတ်လပ်ရေးကို ရယူကြရန် စည်းလုံးညီညွတ်သည့် သဘောထားကို ပြခဲ့သော စာချုပ်လည်း ဖြစ်သည်။

ထိုအခြေခံပေါ်တွင်မူတည်၍ ၁၉၄၈ခုနှစ် ဇန်နဝါရီလ ၄ရက်နေ့တွင် မြန်မာနိုင်ငံသည် တပေါင်းတစည်းတည်း အချုပ်အခြာ အာဏာပိုင်သော နိုင်ငံတော်အဖြစ် ရောက်ရှိခဲ့ ပေသည်။သို့ရာတွင် မြန်မာတမျိုးသားလုံး သူ့ကျွန်ဘဝမှ လွတ်မြောက်ရန်နှင့် တိုင်းရင်းသား များ စည်းလုံး ညီညွတ်မှု ရရှိရန် မနားမနေ ကြိုးစားခဲ့သော အမျိုးသားခေါင်းဆောင်ကြီး ဗိုလ်ချုပ် အောင်ဆန်းသည် အမျိုးသား သစ္စာဖောက်များ၏ လက်ချက်ဖြင့် ကျဆုံးခဲ့ရပြီး လွတ်လပ်ရေး ရသည်ကိုပင် မြင်မသွား ခဲ့ရရှာပေ။ ထို့အတူ တိုင်းရင်းသား ခေါင်းဆောင်များ အပါအဝင် အာဇာနည် ခေါင်းဆောင် (၈)ဦးတို့သည်လည်း ဗိုလ်ချုပ်အောင်ဆန်းနှင့် အတူ လုပ်ကြံခံခဲ့ ကြရ ပေသည်။

ယနေ့လွတ်လပ်ရေးရရှိပြီးသည်မှာ ၆၁ နှစ်ကြာရှိခဲ့သော်လည်း ကျွန်ုပ်တို့ တမျိုးသားလုံးမှာ လွတ်လပ်ခွင့် အရသာကို ခံစားနေရခြင်း မရှိသေးပေ။ လွတ်လပ်ရေး ရပြီးချိန်တွင်လည်း ပြည်တွင်းစစ်ဖြစ်ပွားခဲ့ရပြီး ၊ လွတ်လပ်ရေး ရပြီးစက ပါလီမန်ဒီမိုကရေစီ စနစ်မှာ ၁၉၆၂ ခုနှစ် မတ်လ (၂) ရက်နေ့၌ ဗိုလ်ချုပ်နေဝင်း ဦးဆောင်သည့် တော်လှန်ရေးကောင်စီမှ နိုင်ငံတော် အာဏာကို မတရား သိမ်းပိုက်၍ စစ်အာဏာရှင်စနစ် ထူထောင်ခဲ့သဖြင့် ချုပ်ငြိမ်းသွား ခဲ့ရပေသည်။

၁၉၈၈ခုနှစ်၌ ရှစ်လေးလုံးအရေးတော်ပုံကြီး ပေါ်ပေါက်လာခဲ့ပြီး တပါတီစနစ်ကို ဖြိုချဖျက်ဆီး နှိုင်ခဲ့သော်လည်း ၁၉၈၈ခုနှစ် စက်တင်ဘာလ (၁၈)ရက်နေ့၌ စစ်တပ်မှ နောက်တကြိမ် စစ်အာဏာ သိမ်းပိုက်ခဲ့ပြန်သည်။ ၁၉၆၂ခုနှစ်မှစ၍ တပါတီအာဏာရှင်စနစ် န ဝ တ ၊ န အ ဖ စစ်အာဏာရှင်တို့သည် မြန်မာပြည်၏ အခြေအနေအရပ်ရပ်ကို ဖျက်ဆီးတိုက်စား ခဲ့ကြပေသည်။ ထိုစစ်အာဏာရှင်များသည် တိုင်းရင်သားလူမျိုးများ၏ ဘဝများကို အငြိုးကြီးစွာဖြင့် စနစ်တကျ ဖျက်ဆီး နေခဲ့ရာ တိုင်ရင်းသား လူမျိုးစုများ၏ ဘဝများသည် အလွန်ပင်စိုးရိမ်ဖွယ် အနေအထားသို့ ရောက်ရှိနေပြီ ဖြစ်သည်။

၆၂ နှစ်မြောက် ပြည်ထောင်စုနေ့အခါသမယတွင် ကျွန်ုပ်တို့သည် တိုင်းရင်းသားလူမျိုးစုများ၏ ဘဝအခြေအနေ များကို အထူးအလေးထားရမည်ဖြစ်သည်။ အမျိုးသားပြည်လည်စည်းလုံး ညီညွတ်ရေး ပြန်လည်ရရှိရန် မဖြစ်မနေကြိုးပမ်းသွားရမည် ဖြစ်ပေသည်။အမျိုးသား ပြန်လည်ညီညွတ်ရေးအတွက် ကြိုးပမ်းကြချိန်တွင် တိုင်းရင်းသား လူမျိုးစုများ၏ အခန်းကဏ္ဍမှာ အလွန် အရေးကြီး နေပေသည်။

သို့ဖြစ်ပါ၍ ကျွန်ုပ်တို့အနေဖြင့် တိုင်းရင်းသားလူမျိုးစုများ အင်အားများနှင့် အတူ စုစည်းညီညွတ်စွာဖြင့် စစ်အာဏာရှင်စနစ်ကို အပြီးတိုင် ဖြိုချဖျက်ဆီးပစ်ပြီး ဒီမိုကရေစီရေး ၊ တရားမျှတမှုရှိရေး၊ တန်းတူညီမျှရေး ဆိုသည့် အနှစ်သာရများကို အတူတကွခံစားခွင့်ရရှိစေရန် စည်းလုံး ညီညွတ်စွာဖြင့် အတူတကွ တိုက်ပွဲ ဝင်ကြပါရန် လူထု လူတန်းစား အားလုံးသို့ တိုက်တွန်း နှိုးဆော်အပ်ပါသည်။


၂၀၀၉ စုစည်းလှုပ်ရှားမှု ကော်မတီ

2009 Collective Action committee(Burma)

No comments:

Post a Comment